दक्ष न्यूज – किम्स मानवता हॉस्पिटलमध्ये पाच बालकांच्या हृदय शस्त्रक्रिया यशस्वी
दक्ष न्यूज : प्रतिनिधी
नाशिक: किम्स मानवता हॉस्पिटल, नाशिक येथे पाच बालकांच्या जन्मजात हृदयविकाराच्या शस्त्रक्रिया यशस्वीपणे पार पडल्या. हे सर्व बालक आर्थिकदृष्ट्या दुर्बल कुटुंबांतील होते आणि त्यांना हृदयविकारावर उपचार घेण्यासाठी सामाजिक संस्था आणि स्वयंसेवी संघटनांच्या सहकार्याने आर्थिक मदत उपलब्ध झाली. शस्त्रक्रिया बालहृदयरोग तज्ञ डॉ. ललित लावणकर यांच्या नेतृत्वाखाली, डॉ. राज नगरकर, व्यवस्थापकीय संचालक, आणि डॉ. निलेश सिंग, मुख्य कार्यकारी अधिकारी यांच्या मार्गदर्शनाखाली करण्यात आल्या.
डॉ. ललित लावणकर यांनी सांगितले की, जन्मजात हृदयविकार (Congenital Heart Defects – CHD) हे जन्मतःच असलेले हृदयाच्या रचनेतील दोष असून, ते हृदयाच्या कार्यक्षमतेवर परिणाम करतात. ते वेळेवर उपचार न झाल्यास गंभीर होऊ शकतात. या गुंतागुंतीच्या शस्त्रक्रिया यशस्वीपणे पार पडल्यावर या मुलांना निरोगी आयुष्य मिळवता येईल, अशी आशा आहे.
किम्स मानवता हॉस्पिटलमध्ये स्वतंत्र बाल हृदयविकार विभाग असून, यामध्ये हृदयविकार तज्ञ, हृदयविकार शस्त्रक्रिया तज्ञ, नवजात शिशु तज्ञ, बालरोग तज्ञ आणि अतिदक्षता विभागातील तज्ञ २४ तास उपलब्ध असतात. तसेच, प्रशिक्षित डॉक्टर, नर्सिंग आणि पॅरामेडिकल स्टाफच्या मदतीने अत्याधुनिक तंत्राचा वापर करून या गुंतागुंतीच्या शस्त्रक्रिया यशस्वी करण्यात आल्या.
सीओओ डॉ. निलेश सिंग म्हणाले की, या शस्त्रक्रिया आंतरराष्ट्रीय दर्जाच्या सुविधांमुळे यशस्वी झाल्या आहेत. हे यश नाशिकमध्ये सर्व सुविधांच्या उपलब्धतेमुळे शक्य झाले आहे. यामुळे या बालकांच्या कुटुंबांना आर्थिक बचत होईल आणि त्यांना पुढील काळात एक निरोगी आयुष्य मिळेल.
कुटुंबीयांनी डॉक्टर आणि हॉस्पिटल प्रशासनाचे आभार मानले आणि त्यांच्या मुलांना नवजीवन मिळाल्याचे सांगितले.
जन्मजात बाल हृदय रोगाची सामान्य लक्षणे:
- वारंवार निमोनिया होणे
- वजन हळूहळू वाढणे
- खूप घाम येणे
- चक्कर येणे
- लवकर थकवा येणे
- छातीत धडधड होणे
- बाळ निळे पडणे
तासानुसार हृदय विकाराची शंका असल्यास तातडीने २डी इकोची टेस्ट करून हृदय विकार तज्ञांचा सल्ला घेण्याचे आवाहन डॉ. ललित लावणकर यांनी केले आहे.
