आदर्श आचार संहिता कालावधीत नमुना मतपत्रिका छपाईवर निर्बंध

दक्ष न्यूज :करणसिंग बावरी

नाशिक: दिनांक (18 ऑक्टोबर) भारत निवडणूक आयोगाकडून महाराष्ट्र विधानसभा सार्वत्रिक निवडणूक 2024 चा कार्यक्रम 15 ऑक्टोबर 2024 रोजी घोषित केला आहे. या दिनांकापासून आदर्श आचार संहिता अंमलात आली आहे. जिल्ह्यातील विधाननसभा निवडणुकीची संपूर्ण प्रक्रिया शांततेत, निर्भय व न्याय वातावरणात पार पाडण्याच्या दृष्टिकोनातून भारतीय नागरी सुरक्षा संहिता 2023 चे कलम 163 अन्वये प्रदान करण्यात आलेल्या शक्तीचा वापर करून नमुना मतपत्रिका छपाईस निवडणूक प्रक्रिया 25 नोव्हेंबर 2024 पूर्ण होईपर्यंत जिल्हादंडाधिकारी जलज शर्मा यांनी निर्बध घालण्याचे आदेश दिले आहेत.या आदेशान्वये राजकीय पक्षांनी, निवडणूक लढविणाऱ्या उमेदवारांनी, त्यांचे प्रतिनिधी व हितचिंतकांनी मुद्रणालयाचे मालक व इतर सर्व माध्यमातून छपाई करणारे मालक व प्रकाशकांना नमुना मतपत्रिका छापांना निर्बंध घालण्यात आले आहेत. यात इतर उमेदवाराचे नाव व त्यांना नेमून देण्यात आलेले चिन्ह वापरणे,

नमुना मतपत्रिकेसाठी आयोगाने निश्चित केल्याप्रमाणे कागद वापरणे व आयोगाने निश्चित केलेल्या कागदाच्या आकारात नमुना मतपत्रिका छापाई करणे इत्यादीवर निर्बंध घालण्यात आले आहेत.हे आदेश निवडणूक प्रक्रिया पूर्ण होईपर्यंत अंमलात राहतील. या आदेशाचा भंग करणाऱ्या व्यक्तीवर भारतीय न्याय संहिता, 2023 चे कलम 223 अन्वये कारवाई केली जाईल, असेही जिल्हादंडाधिकारी श्री. शर्मा यांनी आदेशित केले आहे.