दक्ष न्यूज – बोराळे फाटा येथे तवेराची दुचाकीला धडक, तीन युवकांचा दुर्दैवी मृत्यू

दक्ष न्यूज प्रतिनिधी : संतोष विधाते

दिंडोरी : वणीहून निफाड तालुक्यातील कारसुळकडे जाणाऱ्या दुचाकीला पाठीमागून वेगात असलेल्या तवेरा कारने धडक दिल्याने झालेल्या भीषण अपघातात तीन युवकांचा दुर्दैवी मृत्यू झाला आहे. शुक्रवारी रात्री साडे नऊच्या सुमारास बोराळे फाटा येथे हा अपघात झाला.

अपघाताची तपशीलवार माहिती:

दुचाकीवरील मंगेश रमेश हिलीम (वय 23), विजय रमेश हिलीम (वय 16), आणि गौरव तुकाराम पवार (वय 20), हे सर्व कारसुळ, तालुका निफाड येथील रहिवासी होते. ते MH 15 BA – 2529 क्रमांकाच्या दुचाकीवरून वणीहून आपल्या गावी परतत असताना मागून येणाऱ्या MH 19 AP – 9933 क्रमांकाच्या तवेरा कारने त्यांना जोरदार धडक दिली. या भीषण अपघातात दुचाकीवरील तिघांचाही जागीच मृत्यू झाला.

अपघाताची माहिती मिळताच परिसरातील नागरिक आणि रस्त्यावरील वाहनचालकांनी घटनास्थळी धाव घेतली. मात्र, तोपर्यंत अपघात करणारा तवेरा कारचालक जखमींना मदत न करता घटनास्थळावरून फरार झाला होता.

वैद्यकीय अधिकाऱ्यांचा अहवाल:

जखमींना तत्काळ वणी ग्रामीण रुग्णालयात दाखल करण्यात आले. परंतु, वैद्यकीय तपासणीत तिघांनाही मृत घोषित करण्यात आले. अपघातामुळे परिसरात हळहळ व्यक्त केली जात आहे.

पोलीस कारवाई:

या अपघाताबाबत शरद माधव पवार (रा. कारसुळ) यांनी तक्रार दिली असून, तवेरा कारचालकाविरुद्ध गुन्हा दाखल करण्यात आला आहे. पोलीस फरार चालकाचा शोध घेत आहेत. दरम्यान, या घटनेमुळे परिसरात शोककळा पसरली आहे.