समृद्धी महामार्गावर भीषण अपघात! २ कारच्या धडकेत ७ जणांचा मृत्यू..

दक्ष न्युज प्रतिनिधी: बाळासाहेब सोनवणे

जालना : मुंबई-नागपूर समृद्धी महामार्गावर भीषण अपघात झाला आहे. दोन कारच्या धडकेत 7 जणांचा मृत्यू झाला आहे. तर 5 जण जखमी झाल्याची माहिती समोर आली आहे. शुक्रवारी रात्री अकराच्या सुमारास हा अपघात झाला. समोर आलेल्या माहितीनुसार, जालना जिल्ह्यातील समृद्धी महामार्गावरील कडवंची गावाजवळ हा अपघात झाला. नागपूरहून मुंबईकडे जाणाऱ्या इर्टिका कारला चुकीच्या बाजूने येणाऱ्या स्विफ्ट डिझायर कारने धडक दिल्याने हा अपघात झाला.

स्विफ्ट कारने धडक दिल्यानंतर ईरटीका कार आणि स्विफ्ट कार समृद्धी महामार्गाचे कठडे तोडून खाली गेल्याची माहिती आहे. ही धडक इतकी जोरदार होती की कारमध्ये बसलेले प्रवासी कारबाहेर रस्त्याच्या कडेला फेकले गेले. या घटनेत 7 जणांना आपला जीव गमवावा लागला, तर 5 जण गंभीर जखमी झाले आहे. जखमी प्रवाशांना रुग्णालयात दाखल करण्यात आले असून त्यांच्यावर उपचार सुरु आहेत.

नांदगाव तालुक्यात गलिच्छ राजकारण! खोटे गुन्हे दाखल करून तरुणांचे आयुष्य बरबाद करण्याचा प्रकार..

या अपघाताची माहिती मिळताच जालना पोलिसांनी घटनास्थळी धाव घेत क्रेनच्या सहाय्याने दोन्ही गाड्या बाहेर एकमेकांपासून बाजूला केल्या व जखमींनी रुग्णवाहिकेच्या सहाय्याने जिल्हा रुग्णालयात दाखल केले. त्यांच्यावर उपचार सुरु असून काहींची प्रकृती चिंताजनक असल्याची माहिती समोर आली आहे.अपघातातील मृतांमध्ये फय्याज शकील मंसुरी, फैजल शकील मंसुरी, अल्थमेश मंसुरी (सर्व रा. मालाड मुंबई पूर्व) प्रदिप लक्ष्मण मिसाळ, संदीप माणीकराव बुधवंत, विलास सुदान कायंदे या प्रवाशांचा समावेश आहे. जखमींपैकी काहींची प्रकृती चिंताजनक असल्याने मृतांचा आकडा वाढण्याची शक्यता आहे. दरम्यान, या अपघातात दोन्ही गाड्यांचा चक्काचूर झाला आहे.